Z Brjazyny/Briesen. Na woklapnicu do Ballhausa pětk jo pśišło wěcej ako 200 wobydlari. Šołtowka Eva-Brigitta Šejcykowa (Schötzig) jo wót zachadnego lěta pozitiwnje powědała, ale teke kritiske pśispomnjeśa njejsu felowali. Do grona jo pśišła Domowinska młoźina, kaž teke Serbske koparje.

Co jo gmejna łoni nawugbała? Wóni su chopili zakładnu šulu wutwarjowaś. Na kjarchobje su wuswěśili zgromadny flak, źož se zakopuju popjelnice. Prědne zakopowanja su se tam južo stali. Teke to twarjenje spěšnego interneta źo derje doprědka.

Druge twaŕske pśedewześa su wótwisne wót pjenjezneje pódpěry, a na jich zwólenje muse hyšći cakaś. K tomu słuša twaŕ pśewoblekarnje a składa we wjažy wognjoweje wobory, kaž teke saněrowanje drogow. Saněrowanje a wótwardowanje sportnišća stanjo se z pomocu Bórkojskego amta.

Šołtowka jo chwaliła zgromadnosć wobydlarjow a mjazsobnu pomoc a pódpěru we gmejnje. To jo pomogało, až budu lětosa informaciske tofle pśi cerkwi stajiś. Na nich buźo wopisana historija jsy, a teke jeje źinsajšne žywjenje a wažnosć.