Zagronita za serbske nastupnosći bórkojskego amta Anett Zyšcyna (Sischke) z Rubyna njelubujo jano serbsku drastwu, ako ma pśi kuždem zejźenju „Serbskeje gromady“ bursku drastwu woblaconu. Ale wóna powěda teke běžnje serbski a jo dlatog woblubowana partnaŕka za rozgrono serbskego rozgłosa rbb. Na fośe ju interviewujo Anja Kochojc. Foto: I. N. 
Z Rubyna/Ruben. Bórkojski amt ma z Anett Zyšcyneju (Sischke) jadnu zagronitu za serbske nastupnosći, kótaraž swójich luźi gromadu wjeźo a źaržy. A to jo było, móžoš groniś, teke to moto zmakanja stawnego serbskego blida „Naša gromada“ 19. februara. Do rubyńskeje stareje šule jo gromadu pśišło wušej 20 luźi, kótarež su we swójom pówołańskem abo cesnoamtskem źěle z tym serbskim zabrane. To su wótkubłarki a wótkubłaŕ, šołtowka a šołta, gmejnske zastupniki a dalšne z amta a zwenka amta.
Wóni su zwětšego pśedstajili głowne zarědowanja ze swójich jsow, kótarež maju lětosa prědk. Tak swěśe Góry 14. a 15. septembra swój 550. wejsny jubilej z wótwórjonymi dwórami a swěźeńskim pśeśěgom. Tam pytaju hyšći wobźělnikow. Kśě teke wejsnu chroniki pśedawaś.
Za Domowniski a drastwiny swěźeń amta 23. do 25. awgusta jo pšosyła Kerstin Möbesowa wót amta, až tam pśiźo wjele žeńskich teke ako woglědarje we serbskej drastwje. Njeźelu wótpołdnja buźo rědny serbski program z Kula Bula a wjele drugimi serbskimi wjeraškami.
