Z Baršća/Forst. Na pósejźenju wokrejsnego sejma Sprjewja-Nysa zachadny tyźeń srjodu we wokrejsnem domje w Baršću su musali wótpósłańce ned dwa raza wuzwólowaś. Pó 8 lětach, ga se lětosa we februarje zakóńcyjo za dweju pśirědowaneju (Beigeordnete) słužba we wokrejsnem zastojnstwje, ako nawjedujotej tam decernat.

Ten prědny, ako to pótrjefijo, jo Olaf Lalk (CDU), ako ma tam tu funkciju 1. pśirědowanego, ako jo zrownju teke prědny zastupnik wokrejsnego razća. Južo wót lěta 2002 wón tam źěła a ma tam na starosći twaŕstwo, rolnikaŕstwo a wobswět.

Jogo městno bu łoni w awgusće wupisane, a 6 paršonow jo se za to pśipowěźeło. Mjazy nimi jo był zasej 57lětny Olaf Lalk, a za togo jo se krajny raźc Harald Altekrüger rozsuźił. Až su cłonki wokrejsnego sejma z jogo źěłom wjelgin spokojom, jo se pokazało pśi wuzwólowanju. Wót 48 pśibytnych wótpósłańcow jo 43 za njogo zgłosowało.