Mjazy wuběgarjami, ak su pó wójnje do chóśebuskich stronow pśišli, jo se namakała licba luźi z pódzajtšnego źěła Dolneje Łužyce wokoło Žarowa (Sorau) a Žemrja (Sommerfeld). To su strony, kótarež su byli něga serbske. Na pólu jich regionalneje historije slěźi a publicěrujo hobby-historikaŕka Ursula Balzerowa, źowka wugnateju starjejšeju ze jsy Niewerle (źinsa Nowa Rola, lažy na poł droze mjazy Duplicami (Teuplitz) a Žemrjom, jadnab 20 km k pódzajtšu wót Baršća). Wóna sama jo se naroźiła južo pó wójnje, w Chóśebuzu, w lěśe 1952. Jeje starjejšej stej bydliłej žedne lěta w Hochozy na Pěskach.