Z Běłowa pla Luboraza/Behlow. „Wokołnosć Starego grodu jo wjelgin rědny flak, a pśez našo serbske wandrowanje rozšyrjamy tudy zasej pó dłujkem casu serbsku rěc“. To jo gronił Jens Martin tym dwanasćo wobźělnikam wandrowanja pśi powitanju sobotu tyźeń. Wón jo wjadł jich k impoznatnemu groźišćoju, ako se hyšći źinsa zwiga 10 m wušej doła Luboraskeje tšugi. Wóno se rowna pó wjelikosći bórkojskemu groźišćoju, rownož njejo tak znate. Wandrarje su namakali samo někotare stare crjopy, někotare pyšnjone pśez rěd depcykow, wudłypanych z palcom.