Z Dešna/Dissen. Regina Herrmann njejo njeznata w Dolnej Łužycy. Ze swójimi figurami wót powěsćow a bajkow jo se mjaztym zadobyła do kolektiwnego wobraza serbskich bajkow a powěsćow. Pśisamem 30 lět su pupki wót njeje we wustajeńcach – w Serbskem muzeumje w měsće, w dešańskem muzeumje a hynźi.

Domowniski muzej Dešno ma něnto aktualnu wustajeńcu wót njeje: „Pśetwórjenje swěta. Na slědach wódnego muža a pśezpołdnice“. Až do 1. septembra su tam pupki a pupy wustajone – nowe a klasikarje, njeznate a znate. Nowe su te błudniki a prědny raz w Dešnje jo ten wužowy kral. Wón jo tak rědny, až muzej jo jogo ned kupił. Wósebnosć teje wustajeńce jo, až wise na sćěnach fota wót natury. Gudrun a Gerd Rattei stej wótmólowałej naturu, źož wuglěda mystiska, wósebnje abo samo śěsnjeca (unheimlich). Rowno ta pšawa slězyna za figury wót nykusa, wužow, pśezpołdnice, błudnikow a dalšnych.

Až to za źiśi zajmne a k rozměśu jo, za to wugótuju wšaku zaběru. Figury ga su we witrinach a źiśi njesměju z nimi graś. Ale za to wulicuju jim bajki, cytaju powěsći, maju jaden kwis, basle a pjaku z nimi klěb lutkow. K tomu źěłaju pšawu butru.