Z Chóśebuza/Cottbus. Kóńc januara jo se na portalu Serbskego instituta dolnoserbski.de pó dwěma lětoma intensiwnego źěła dolnoserbska digitalna biblioteka spśistupniła. To jo źasety modul na tom boce. Což jo namakaś we tej bibliotece, stoj w dypku „katalog“. Biblioteka wopśimjejo a spśistupnijo wjeliki źěl dolnoserbskego historiskego pismojstwa – publicistiske, beletristiske, wěcne a wědomnostne teksty, kenž su se śišćali mjazy 1706 a 1936. W katalogu jo 302 tekstow. Pla casnikow jo jadna jadnotka ceły lětnik, nic to jadnotliwe cysło. Wšykne lětniki Casnika su w bibliotece z połnym tekstom (84), Bramborski (Serbski) Casnik mjazy 1848 a 1933, wše Pratyje (1882–1937) a Wósadniki (1904–1913) a jadnab 200 knigłow.