Z Dešna/Dissen. Slědny pětk zeger 11:00 su zwóny zwónili w cerkwi w Dešnje. To jo było znamje za to, až su na tamnem kjarchobje zakopowali serbsku žeńsku, ako jo wjele wugbała a naźěłała za serbstwo. Jo to była Erika Janowa, kenž jo 12. awgusta, 90 lět stara, wumrěła. Styri źiśi a dalšne z Janojc familije, pśiswójźbne a wobydlarje su se ten źeń ze zemrěteju rozžognowali. Serbska faraŕka Katarina Köhlerowa jo w serbskej a nimskej rěcy na nju, jeje žywjenje a zasłužby spominała. Naroźona w Rownem w Slěpjańskej wósaźe jo wucyła pó wójnje w šulach w Českej a za tym jo studěrowała na ceptaŕstwo. W casu NDR jo we wšakich šulach Dolneje Łužyce młogim źiśam wuwucyła dolnoserbsku rěc. Wóna jo basniła rědne dolnoserbske gronka a štucki wósebnje za źiśi, jo pisała za Casnik a Pratyju a jo zestajiła nowu antologiju z dolnoserbskimi awtorkami a awtorami. Wjelike zasłužby ma wóna pśi nastaśu a załoženju Domowinskego muzeja w Dešnje w lěśe 1983. Mjazy žałujucymi, ak su jej k cesći tek zgłosyli dolnoserbski kjarliž „O swět, ja dejm śi spušćiś“, su byli Madlena Norbergowa wót Rěcnego centruma WITAJ, župan dr.