Z Barlinja/Berlin. Z nowym wopomnišćom na městnje něgajšnego lěgwa na kjarchobje w Neuköllnje (Barliń) stej krajna cerkwja EKBO a Ewangelska cerkwja w Nimskej (EKD) spomnjełej na nuzkane źěło we swójich wósadach a institucijach. To lěgwo jo se załožyło w lěśe 1942 w nadawku barlinskich wósadow. Wěcej ako 100 nuzkanych źěłaśerjow a źěłaśeŕkow z krajow tencasnego Sowjetskego zwězka jo tam žywych było, pód katastrofalnymi wobstojnosćami. W Barlinju jo jadnab poł miliona luźi musało nuzkane źěło gótowaś, w bronjeńskej industriji, za komuny a w priwatnych domacnosćach. Nejwětša kupka wót nich jo była z okupěrowanych krajow w pódzajtšnej a pódwjacornej Europje. Ako slědnu źěłowu rezerwu su musali wót lěta 1944 popajźeńce z koncentraciskich lěgwow sobu pomagaś. To nuzkane źěło jo było w rolnikaŕstwje a gólnistwje, w chórownjach, wótwardowańskich domach, źěłaŕnjach, na kjarchobach a doma pla fararjow. Až na 15.000 luźi jo źěłało pśeśiwo swójej wóli za ewangelsku cerkwju a nutśikowne pósołstwo, 75 procentow wót nich su byli žeńske.