Lětne grono za 2023 jo: „Ty sy jaden Bog, kenž mě wiźi.“ (1. Mojzasa 16,13). W dolnoserbskej bibliji cytamy na tom městnje: „Ty Bog wiźeš mě“. Pó stolětach jo słušała ta sada k tym groznym sadam biblije. Njelicone luźe su se bójali, až Bog jich wšuźi wiźi, kaž wjednik pótajmneje słužby abo njewidobny tšašny guslaŕ. Mimo togo njejsu se pśecej wěste byli, co jo jano lichotna wóla a co jo južo grěch. Su ga cerkwine a statne instance jim gronili, až njepósłušnosć napśeśiwo knězam jo teke njepósłušnosć napśeśiwo Bogoju. Samo źiśi su se musali stawnje spowědaś, lěc rownož wó spowěźenju źiśi njejo žedno słowo w bibliji. To jo rozymliwe, dokulaž abstraktne wěcy ako grěch, humanizm abo ironija su za źiśecy duch pśewusoke.