Z Budyšyna/Bautzen. Slawist dr. Gerald Stone (1932–2021), kenž jo wjele wugbał za serbske slěźenja, dej dostaś wopomnišćo. Za to su we Serbach pjenjeze zběrali, teke w Serbskich Nowinach a w Nowem Casniku su wó to pšosyli w lěśu 2022. Něnto jo Maćica Serbska pósłała tych pósćonych 1.070 euro do Oxforda. Telik pjenjez su se za togo wuznamnego engelskego slawista a pśijaśela Serbow nazběrali. Dawarje su byli šesć priwatnych luźi a styri towaristwa, ga Maćica Serbska, Pśijaśele Smolerojc knigłaŕnje, Serbske ewangelske towaristwo a Towaristwo za spěchowanje serbskeje rěcy w cerkwi.

Wopomnišćo dej nastaś we uniwersiśe w Oxforźe, ga w bibliotece togo Hertford College, źož Gerald Stone jo mjazy 1972 a 1999 statkował ako docent slawistiki. We wótźělenju za moderne rěcy we tej bibliotece dej se załožyś wósebna wótnožka z wózjawjenjami Stone, a teke dalšne publikacije k serbskim temam, kótarež su wujšli w engelskorěcnymi krajami. Wušej togo dej tam tofla spomnjeś na togo wuconego a mjenja głownych pósćiwarjow. W běgu lěta 2023 kśě zachopiś twariś we tej bibliotece.