Na wrośenicy zachopka wójny w Ukrainje su se kśesćijany w žylojskej cerkwje na měrowe bjatowanje zmakali. Tam su diskutěrowali, kak mógali se kśesćijany w zjawnosći k temje wójna a měr artikulěrowaś. We tom zwisku su pśišli na akciju pśi droze na wujězdźe z Wjerbna do směra Bórkow. Na pólu stoje tam pśecej zasej transparenty z bibliskeju slězynu. Iniciator togo jo Wjerbanaŕ Johannes Źyłka (Schilka). Gregor Zielonkowski jo se z nim rozgranjał.

 Kněz Źyłka, wy se intensiwnje z bibliju zaběraśo. Stakim sćo drje pśeznanjony kśesćijan?

Zwisk k cerkwi jo był něga za luźi w serbskich jsach absolutnje normalny. Tak jo wěra wót wšogo zachopjeńka k mójomu žywjenju pśisłušała. W młodych lětach jo to w socializmje wšykno pitśku pópušćiło, ale ako som pótom wót mójeje rodneje jsy Góry k staryma starjejšyma do Wjerbna śěgnuł, wónej bydlitej pśi cerkwi, jo se to wšo zasej wjelgin intensiwěrowało. A samo tak daloko, až cu teke drugich luźi pózbuźiś, wó Bogu a swěśe pśemyslowaś.

 Co se mysliśo, wustatkuju se waša iniciatiwa a plakaty pla tych, kótarež mimo jědu?