Z Blunja/Bluno. Wjasele a góruco jo Helmut Kurjo spiwał, tek w serbskem chorje Židźino-Bjezdowy. W kjarližach a bjatowanju jo był žywy we swójej dolnoserbskej maminej rěcy. Jo, a wón jo aktiwny cłonk Domowiny był. Pjerwjej jo teke był braška, a to dłujke lěta. Žywy jo był w rodnej jsy Bluń. Bluń lažy mjazu Wjelceju a Wórjejcami, mjazy jamami a nowymi jazorami. Wjas pśisłuša wórjejskim stronam, což bursku drastwu nastupa, jo pak ewangelskeje konfesije. Bluń jo źinsa w Sakskej, pśisłuša pak Dolnej Łužycy, což tu rěc nastupa. Wěste wósebnosći su, tak gronje how „prajiś“ město „groniś“. Tamna cerkwja jo wósebnje rědna, a jo do pachow murjowana. We tom Bóžem domje jo bratš Kurjo w juniju 2018 z wjele drugimi swěśił namšu, z kótarejuž su wótwórili 11. Serbski ewangelski cerkwiny źeń wórjejcańskich stronow. Tenraz jo był 83, a jo mě wulicował wót swójeje wěry a wót swójeje zwězanosći z cerkwju. To njejo mójo jadnučke zmakanje z nim było. Mam Helmuta Kurja we spomnjeśu ako luź z wótwórjoneju wutšobku, wón jo se wuznawał z wjele wěcami, zewšym njejo był gjardy a jo rad pomagał.

Jogo familija jo była chytša we wěrje