Z Janšojc/Jänschwalde. Ewangelska wósada a Serbsko-nimski domowniski muzej Janšojce stej na palmicu na swěźeński koncert do cerkwje pśepšosyłej. Janšojski žeńskecy chor a prědny raz teke janšojske muskece spiwne towaristwo „Frohsinn“ stej dałej pód nawjedowanim Geralda Šejna serbske a nimske spiwy zaklincaś. W až do slědnego městna połnej cerkwi jo było wiźeś, až jo zajm a póžedanje za měrnu a pówažnu góźinu rowno w tych casach wjelike. Gerald Šejn jo za swójej chora teke regionalne historiske spiwy a spiwanja wupytał. Tak jo zazněł na zachopjeńku wót Fryca Rochy (1863-1942) póchadajucy spiw wó gusynych kwětkach „Na łuce kwiśo“, spiwany pó melodiji „Nalětna Bóža kšasnosć“ - „Geh aus mein Herz und suche Freud“ Pawoła Gerharda (1607-1676). Faraŕ Ingolf Kśěnka jo dał krotki pśeglěd wó žywjenju w Šejnejźe roźonego Fryca Rochy. Slědowałej stej dwa kjarliža we łatyńskej rěcy. Cornelia Vahderowa jo pó programje dalej wjadła a jo pśipowěźeła: „Něnto dostanjomy za pśiduce tśi spiwy pódpěru wót muskecego chora a spiwamy gromaźe.“ Ako prědny „Prědny nalětny źeń“, z kótarymž młode nalěśe witaju.