Z Cerkwice/Zerkwitz. Tśi lěta su tudy měli pawzu se swójeju jatšownu tradiciju, we tej jsy pla Lubnjowa. Lětosa pak su se zasej jatšownicu wudali na swójich kónjach a su ducy byli pó Cerkwicy w Lubnjojskej wósaźe. To jo było 23. rejtowanje, licone wót lěta 1998. Pódla jo było 23 rejtaŕskich pórow, zwětšego žeńske a źowća. Pśišli su ze wšakich městow a jsow. Na pyšnych kónjach su styri štundy dłujko wobrejtowali Cerkwicańsku wósadu.

Wěcej hundert woglědari su se njeźelu zgromaźili pśi cerkwi w Cerkwicy, aby se wšo woglědali. Mjazy nimi jo był Paul Lott, wón jo 88 lět stary a bydli we jsy Rogozno-Stobrice pla Łukowa. „Cełe lěto ja se wjaselim na to jatšowne rejtowanje“, jo wón Casnikoju gronił. Jo, wón jo był teke wjele lět zagronity za wěstosć a pórěd togo śěga, za kónje a rejtarjow. Kak wažny ten nadawk jo, jo se lětosa pokazało: Ako śěg jo se zestajił, jo pór kóni spłošyło, a jo wažne a dobre było, až něcht jo se wó tu wěc starał.