Z Dešna/Dissen. Zajźony pětk jo dał chor „Łužyca“ swój tradicionelny koncert w dešańskej cerkwi. Wěcej ako 100 woglědowarjow jo słuchało na zdźěla styrigłosowe jatšowne kjarliže. Cłonka chora Dešanaŕka Christina Kliemowa jo wuwitała gósći dwójorěcnje w cerkwi. Wóna jo rozkładła nałog jatšownego spiwanja a cogodla jo se wón w casu DDR zgubił. Kótaru namšaŕsku drastwu su k śichemu pětkoju nosyli: zelenu kóšulu, carnu polku, běłe rubiško a lapu.

Kompletny chor „Łužyca“ jo spiwał, pótakem teke muske, lěcrownož se nałog jatšownego spiwanja w Dolnej Łužycy jano wót žeńskich woplěwa. Faraŕka Katharina Köhlerowa jo koncert wudopołniła z nabóžninu.

Wěcej ako 20 lět dopomina chor „Łužyca“ ze swójim koncertom k śichemu pětkoju na zabyty nałog jatšownego spiwanja. Kak rědnje jo wiźeś, až se nałog we wšakich městnosćach wótnowotki wóžywijo!