Z Drježdźan/Dresden. Sobotu, 3. junija, su se dali spiwaŕki a spiwarje chora Łužyca na drogu do Drježdźan. Pód motom „Jaskolicka, šwigalicka – Wo die Schwalbe singt“ jo se wótměł w Grodojskej cerkwi Lockwitz, kenž jo měsćański źěl głownego města Sakskeje, koncert w ramiku 15. komoroweje muziki Lockwitz, na kótaremž jo se chor Łužyca wobźělił. Sobustatkujucych w cerkwi jo zajmowany publikum wuwitał a pózdźej z aplawsom za pśedstajenje cesćił.

Chor Łužyca jo nejrědnjejše serbske ludowe spiwy z Dolneje a Górneje Łužyce wuspiwał, ale teke ze wšakich regionow Pólskeje, Słowakskeje a z Chorwatskeje. Pśi tom jo jen duo Słowjańske barwy muzikaliski pódpěrował. Muzikarja Lubina Žurec-Pukačowa a Jaroslav Pukač stej górno- a dolnoserbske, tak ako słowakske ludowe spiwy pśedstajiłej. K tomu stej grałej na wósebnych muzikowych instrumentach, ako na pśikład na słowakskej pastyŕskej flejśe fujara, na dudlawce (Drehleier), na brumejzy (Maultrommel) a na dudach.