Z Liškowa/Lieskow. We wjelgin gnujucej namšy pód gołym njebjom na wopomnišću za zgubjonu wjas Liškow jo se rozžognował janšojski faraŕ Ingolf Kśenka z amta serbskego dušepastyrja.

Źěłowa kupka Serbska namša jo kazała na serbsko–nimsku namšu sobotu 19. awgusta na kšomje něgajšneje wugloweje jamy Chóśebuz-pódpołnoc. Faraŕ Kśenka jo sebje žycył to městno za rozžognowańsku namšu, dokulaž jogo žywjeńska droga jo była na wšake wašnje z brunicu zwězana. Ako faraŕ w Nosydłojcach jo wón był jaden z wažnych sobuzałožowarjow bergaŕskeje iniciatiwy „Klinkojska runda“, ako bramborske krajne kněžaŕstwo w lěśe 2007 jo pśespytowało wótwórjenje noweju jamowu pla Baršća a pla Janšojc. Klinkojska runda jo se woborała wušej 10 lět pśeśiwo planam wótbagrowanja – na kóńcu wuspěšnje. W tom casu jo Kśenka pśewzeł janšojsku farsku wósadu, a wót lěta 2012 jo był zagronity za serbske dušepastyŕstwo w Dolnej Łužycy.