Z Wětošowa/Vetschau. Rědna tradicija su w prědnych tyźenjach nowego lěta te wustupy Wětošojskego muzikowego towaristwa na wšakich městnach we Błotach. Pśecej startuju we wětošojskej cerkwi.

A chtož jo se na prědnem sobotnem wótpołdnju w januarje tej cerkwi bližył, tomu su južo orchestralne zuki napśeśiwo pśišli: To su byli te slědne proby Wětošojskego muzikowego towaristwa pśed wustupom, kótarež su prědne woglědarje koncerta słyšaś mógali. Pó krotkem wótpócynku su muzikarje a muzikaŕki se zesedali, dirigent Markus Witzsche jo zwignuł taktowy kijašk – nowolětny koncert jo se zachopił. Repertoire jo segał wót klasiki pśez filmowu muziku k rockowym adapcijam. K cesnym gósćam w prědnem rěźe su słušali krajny raźc Siegurd Heinze kaž teke šołśe Wětošowa a Lubnjowa, Bengt Kanzler a Helmut Wenzel.