Ze Kśišowa/Krieschow. Skóńcnje pó styri lětach wót korony nanuzkaneje pawze jo kśišojska zakładna šula zasej organizěrowała beneficny koncert. Za program jo kužda rědownja něco pśinosowała. Tak jo se kśišojska cerkwja pětk, 12. januara, z gjardymi a narskimi starjejšymi, starymi starjejšymi a pśijaśelami połniła.

Źiśi a teke ceptarje su byli nerwozne, to se wě. Ale ako su te prědne melodije zazněli, jo se pśeměniła nerwoznosć do wjasela a do mócy. Z wjele šposom su źiśi prezentěrowali swój program. Su spiwali wót swójogo žycenja za měrom, wó tom, kak wjelike južo su a kak rozdźělne, teke wót swójeje šule, z kótarejuž we fantaziji pó mórju droguju, mimo togo wót radosći šlundrowanja na zmarznjonem jazorje. Z kuždego spiwa stej wuklincałej žywjeńske wjasele a špos pśi zgromadnosći.