Z Bórkow/Burg. Źěłowa kupka Serbska namša a ewangelska wósada w Bórkowach stej kazałej 25. februara na serbsko-nimsku namšu. Wóna jo stojała pód motom: Bog hopokazujo swóju lubosć k nam w tom, až Kristus za nas jo humrěł, ako hyšći grěšniki běchmy.

Na 30 kśesćijanow, mjazy drugim wósadne a konfirmandy z Bórkow, gósći z Wětošowa, Barbuka, Limbarka, Mósta a z Chóśebuza su pśichwatali do wósadnego doma napśeśiwo cerkwi. Liturgiske nawjedowanje jo měła serbska lektorka dr. Madlena Norberg. Ewangeliumowy tekst, kenž stoj pla Jana 3,14-21 se zachopijo ze slědujucymi słowami: „A rowno ako Mojzas w pusćinje huža jo póhušył, tak dej togo cłowjeka syn póhušony hordowaś.“ Do swójogo prjatkowanja jo dr. Hartmut S. Leipner zapśěgnuł teke powěsć z Błotow wó wužowem kralu, bibliske citaty, ako su zwězane z wužami a jo slědk glědał do casa, ako su Israelity śerpjeli pód egyptojskim njewólnistwom. Zakóńcył jo wón ze słowami połne naźeje: „We wšyknom móžomy Boga namakaś, kótaryž nas wzejo pśi ruce a wumóžyjo. Dowěra do Boga wótgadujo a źaržy pśi žywjenju mjazy wužami.“