Ako som był ze swójim synom Dawidom (32) łoni nazymu prědny raz w swójom žywjenju w USA, smej měłej winikojski wobraz: Donalda Trumpa a jogo pśiwisniki. Kak móžoš jan takego typa wuzwóliś? W New Yorku, Memphis a New Orleans smej pótom pśisamem jano zmakałej luźi, kótarež su Billa Clintona, Baraka Obamu, Kamalu Harris a k nuzy Joe Bidena wuzwólili. Smej se pšašałej, wótkul ga pśidu „Trumpisty“? Wótegrono jo było: „We srjejźnem pódwjacorje, wósebnje pak w Texasu – tam namakajośo jano takich luźi!“ Smej pótakem warnowanej byłej.

Pó lutherskej namšy we Warda (Texas) smej dostałej wutšobne pśepšosenje k jězy wót Jacka a Marian Wiederholdojc, pótomnikowu nimskich a serbskich wudrogowarjow pěteje generacije. Cystej Texanarja. Njejstej hyšći žednje w New Yorku byłej a tam teke zewšym njocotej. Toś to žywjenje wjelikich měsćanarjow jo jima jano z telewizije znate. Ale tam nic njedajo, což jima napšawdu felujo. Pjenjezna póžednosć, pśekšasna reklama, drogi a kriminalita – ně, źěkujomej se! A mej smej musałej se pśiznaś w jeju domje: Smej namakałej w jeju pśibytnosći měrny wótpócynk.