Z Baršća/Forst. Dnja 9. junija se njewuzwólijo jano nowy Europski parlament, ale teke nowe komunalne parlamenty a ludowe zastupnistwa we wokrejsach, městach a gmejnach. Južo wšuźi wise te plakaty, kótarež wabje za partaje a kandidatow. Teke we jsach jo jich južo dosć a jich buźo hyšći wěcej w pśiducych tyźenjach.

W samskem casu pak zakóńcyju něntejšne parlamenty a wólone zastupnistwa swójo źěło. Wólbna perioda 2019 do 2024 se chyla ku kóńcoju. To plaśi teke za wokrejsny sejm wokrejsa Sprjewja-Nysa. Ten jo se zmakał slědny tyźeń srjodu we Wokrejsnem domje w Baršću k swójej slědnej zgromaźinje. Slědny raz jo dr. Thomas Schüler z Baršća ako pśedsedaŕ wokrejsnego parlamenta pśibytnych wótpósłańcow a gósći witał teke pó serbsku „Dobry źeń, witajśo k nam“. A wótpósłańce su měli na swójom slědnem pósejźenju hyšći dosć źěła. Zaběrali ga su se z tym, kak to wuglěda ze strukturneju změnu we wokrejsu a kak stoj to z noweju cełkowneju šulu w gmejnje Gołkojce. A wobzamknuli su (bóžko) teke wuše płaśizny za taksi.