Z Dešna/Dissen. Njeźelu su Zorjaki na drugu rěcnu kafejownju do swójogo rěcnego gnězda do Dešna kazali a pśepšosenjeju jo pśi nejrědnjejšem słyńckowatem wjedrje, se wě, mań luźi slědowała. Na dwórje starego burskego dwóra jo se cełe wótpołdnjo wjerśeło kołowokoło dolnoserbskeje rěcy, teke za tych, kenž ju njewuměju, su tofle a kórtki z wokablami a rěcnymi wobrotami z nimskim pśełožkom pśigótowali. Tak jo kuždy šansu dostał sebje kafej, kusk mazańca abo pizzu na serbski skazaś a se je pótom pśi rozgronje z drugimi šmekowaś daś.