Z Dešna/Dissen. Njejo mjaztym nic njewšednego – kužde sportowe towaristwo ma drastwu ze swójeju rodneju jsu a ze swójim towarišnostnym logo na se. Teke mjazy młoźinami w Dolnej Łužycy njejo to dawno wěcej žeden rědki wobraz. Tak nose w Bórkowach, Barbuku, Gołbinje abo Škódowje južo dawno pulowry a t-shirty z napisom młoźiny a jsy, změstymi samo dwójorěcnje.

Teke dešańska młoźina jo se něnto do togo „trenda“ dała. T-shirty a pulowry budu w barwje oliwy. Na kśebjaśe jo wiźeś w drobnych běłych linijach rejtaŕ pśi łapanju kokota a žeńska w serbskej drastwje, a mjazy nima cytaś jo w nimskej a (bóžko wjelgin mało) w serbskej rěcy „dešańska młoźina“. Prězy na gruźi stoj pótom mě nosarja a na rukawje smužka spiwa „Paleńc.“ Pśedłoga za logo stej byłej młoźinski šef Martin Hoffmann a Madlena Hanišojc, wobraz jo nastał pśi slědnem łapanju kokota. Zwopšawdniła jo ten logo młoźinski cłonk Nele Mankojc. Wóna jo wobcerjenja wótkresliła a jo logo digitalizěrowała. Což tak jadnorje klincy, jo był dłujki proces.