Z Města a Wětošowa/Cottbus und Vetschau. Raz byś pšawy wuměłc a swóju wuměłsku twóŕbu w muzeju wjele luźam prezentěrowaś – toś tu móžnosć jo měło 24 hortowych źiśi z Wětošowa, źěkowano Katharinje Kliemowej wót Serskego muzeja w Chóśebuzu. W nazymje 2023 jo k nam dojšło pšašanje, lěc mógali kreslenja hortowych źiśi k temje jatšy wustajeńsku płoń połniś. Kreatiwne głowki z kreatiwneje źěłoweje kupki wót Philippa Kaltschmidta a Tiny Schmidtoweje kaž teke źiśi Witaj-projekta wót Anke Gräfoweje (wjednica horta) njejsu dłujko wó tom pśemysliś trjebali, su se do źěła dali. A to jo startowało w januarje. Za wjelikimi blidami su wóni nejpjerwjej pilnje zběrali ideje a zapśimjeśa wokoło jatš, aby to wuzwólenje motiwow lažčejše było. A pótom: „Na šćotki, barwiki gótowe, start!“ („Auf die Pinsel, Stifte, fertig los!“). Granice glědajucy na techniki njejsu se našym małym wuměłcam a wuměłcowkam sajźili, kužda mólowańska technika jo se dowóliła. Tak su nastali nejwšakorakše motiwy z pasteloweje kridy, abo ako raděrowanje, kolaže, ze siluetowym rězom głowy, teke akwarele.