Ze Žytawy/Zittau. Dnja 1. maja 2004, to groni pśed 20 lětami, stej Pólska a Česka (pódla wósym dalšnych statow) pśistupiłej Euroskej Uniji. Ku tej góźbje su sobotu, 27. apryla, zastupnistwo EU-komisije, Europski parlament, Europska inwesticiska banka a dalšne partnarje z Nimskeje, Pólskeje a Českeje pšosyli na Europski swěźeń w tśikrajowem rožku pśi Žytawje.

Na tom swěźenju stej teke gibanje Slavonic Europe z Brüssela a Słowjańske groźišćo Raduš se wobźěliłej, stej tam z gromadneju stojnicu swój wótglěd ku strategiskemu gromadnemu źěłoju w tśikrajowem regionje zwurazniłej. Teke cłonki serbskeje drastwineje kupki z Raduša a Europskego kongresa za Ukrainarjow (ECU; ma sedło w Praze) su pśi tej stojnicy pódla byli.