Z Lubnjowa/Lübbenau. Srjodu a stwórtk, 23. a 24. apryla, su póznali zastupniki europskich mjeńšynow, kótarež njamaju maminy kraj, serbsku kulturu a błośańsku a dolnołužysku krajinu. Južo pěś lět statkujo a schadujo se źěłowe zjadnośeństwo „non-kin-state“ europskeje mjeńšynoweje organizacije FUEN (Federalistiska unija europskich narodow). Lětosa jo se to stało w Lubnjowje, w Błotach, aby pla nas wó wažnych temach powědali a diskutěrowali. Gósćinaŕka Domowina njejo se jano za to starała, až gósći ze wšakich krajow Europy dostanu dłymoki póglěd do kultury, do rěcy, do stawiznow a instituciolneje organizacije serbskeje mjeńšyny. Wóna jo jim teke organizěrowała wulěty – na cołnje na Lědy, do brunicoweje krajiny wokoło Wjelceje a tamnego archeotechniskego muzeja – a teke wótměnjaty kulturny program, pśedewšym z kapału Serbska reja.