Chorzów. Dnja 27. a 28. apryla 2024 jo se wótměł kongres domorodneje kultury SLAVNI. Městno zarědowanjow jo był muzej „Górnošlazyński etnografiski park w Chórzowje“. SLAVNI jo nejwětše zarědowanje pó cełej Pólskej, kótarež se zaběra z literaturu, stawiznami a mytologiju słowjańskich, nordiskich a keltisko-germaniskich ludow ako teke z pólskeju ludoweju kulturu. Na zarědowanju su měli mjazy drugim wiki z wěcej ako 50 wustajarjami. Dalej su byli w programje muzikaliska rewija, pśed-stajenja srjejźowěkojskich słowjańskich wójowarjow, turněra za dorosćonych a źiśecych pšužynarjow (Bogenschützen), zmakanje awtorow, pśednoski a rozgrona, basleńske źěłaŕnicki, podiumowe diskusije a wšakorake graśa za źiśi a dorosćonych. Wušej togo jo był pśistupny wjeliki muzej pód gołym njebjom ze starymi drjewjanymi twarjenjami zajźonych stolěśow. Pó informaciji zarědowarja jo lětosa 3.500 luźi SLAVNI woglědało. Wobźělniki a gósći su měli gluku z pśisamem lěśojskim wjedrom.