Na kótare temy mógu se cytaŕki a cytarje Płomjenja wjaseliś?

Wósebnje za młodše źiśi mamy w nowem wudaśu baseń „Majski bruk“ a wulicowanje wó kokošach, kenž trjebaju nowe knigły za cytanje a daju se na dyrdakojsku drogu do města. Co wšykno ducy dožywiju, to zgóniju źiśi we wulicowanju „Cytański futer za kokošy“ (wulicowanje jo móžno sebje teke wótsłuchaś!). Za pitśku starše wuknice a wukniki mamy zajmny artikel wó Koblowskem jazorje (Koboldsee). To jo pšawje powěsćate městno na pódpołnocy Tšupca a wupłaśijo se, jo sebje woglědaś a teke cytaś w Płomjenju wó zajmnostkach kołowokoło jazora. A dalšny artikel wjeźo nas teke do pśirody, ale tšochu dalej, do Baden-Württembergskeje.

Namakajomy w Płomjenju teke artikele wó serbskich zarědowanjach?