Z Gołkojc/Kolkwitz. Z gronkom psalma 23 „Ja wóstanu w Knězowej wjažy nimjernje“ pśepšosyjo Serbska wósada na Serbski ewangelski cerkwiny źeń njeźelu, 2. junija 2024 do Gołkojc. Swětocna namša z Bóžym blidom se zachopijo zeger 10:00 w gołkojskej wejsnej cerkwi na Šulskej droze 1. Liturgiske nawjedowanje změjotej faraŕ dr. Stefan Reichelt z Blunja a faraŕ Tobias Pawoł Jachmann z Baršća, kenž teke prjatkujo. Na orgelach grajo wokrejsny kantor na wuměńku Wilfried Wilke. Chor Łužyca namšu muzikaliski wobrubijo. Póbitujo se teke dwójorěcna źiśeca namša. Zagronita kupka Serbska namša wócakujo namšarjow a gósći z cełeje Łužyce. Za Serbow z Górneje Łužyce tamne Serbske ewangelske towaristwo stajijo bus k dispoziciji, ako wótjěźo wót Budyšyna.