Z Barlinja/Berlin. Pónjeźele jo se wótměło 76. zmakanje Parlametariskeje pśirady Załožby za serbski lud w Zwězkowem sejmje w Barlinju. Na tom slědnem pósejźenju gremiuma pśed wuzwólowanjami w Bramborskej a Sakskej su se intensiwnje rozgranjali wó 5. financnem dogronje mjazy Załožbu, Zwězkoju, zwězkowym krajom Bramborska a Lichotnym statom Sakska. „Smy zgónili, kak śěžko se ma Zwězk, pśidatne pjenjeze za Załožbu wobstaraś“, jo gronił pśedsedaŕ pśirady, Marko Šiman, Nowemu Casnikoju. Južo połtera lěta wjeźo pśirada diskusije wó tom dogronje, stoj w naglěźe śěžkeje financneje situacije. Dalej pak wobstoj naźeja, až móžotej Bramborska a Sakska swój późěl za Załožbu dalej pśinosowaś, tak Šiman.