Pśed 90 lětami jo wobzamknuła Wuznawaŕska cerkwja swójo Barmenske teologiske wuzjawjenje (Barmer theologische Erklärung). Historiska slězyna wobzamknjenja teje cerkwineje opozicije jo jasna: Jo było napśeśiwjenje na gibanje Deutsche Christen, kótarež jo pśinjasło nacionalsocialistisku ideologiju do ewangelskeje cerkwje. Wót lěta 1948 słuša Barmenske wuzjawjenje k zakładnym wuznawańskim spisam. Źinsa som kradu zaźiwany, kaku aktualnosć ten historiski dokument zasej ma. To płaśi ako za teologiske konkluzije tak teke za rozpominanja wó póśěgu cerkwje a stata. Za kuždego kśesćijana se wupłaśijo, ten tekst dokradnje cytaś na orientaciju w pśibytnosći. Prědna teza se zachopijo z bibliskim citatom: Jezus źejo: Ja som ta droga a ta wěrnosć a to žywjenje (Jan 14,6). Wót togo se wótwóźujo, až mimo Bóžego słowa njejo žedno druge žrědło wěrnosći a zapowědanja. Jo jano jaden samy Kněz, a to jo Jezus Kristus. Pó njom mamy se wusměriś, njejo nichten drugi. Bazěrujucy na take zakładne wuznaśe jo nalětna krajna synoda ewangelskeje cerkwje EKBO něnto konsekwentnje reagěrowała.