Z Gołkojc/Kolkwitz. Prědnu njeźelu w juniju jo se wótměł 78. Serbski ewangelski cerkwiny źeń w Gołkojcach. Wón jo póbitował móžnosći we bogatej licbje serbske nałogi woplěwaś, se wopóznawaś ze serbskeju historiju, serbsku rěc powědaś a słyšaś, serbskich luźi póznawaś, rědne serbske drastwy pokazaś, spiwam pśisłuchaś a sobu spiwaś.

Mócna a

žywa wósada

Až do 1930ych lět jo se w Gołkojcach a we wokolnych jsach skóro jano serbski powědał. To jo było žywy wšedny źeń – teke pśi swěźenjach. A skóńcnje su teke w Gółkojcach žywe byli a statkowali wuznamne serbske fararje ako Jan Bjedrich Fryco (Johann Friedrich Fritze), Jan Bjedrich Tešnaŕ (Johann Friedrich Teschner) a Karl Haußig.