Z wokrejsa Górne Błota-Łužyca/Landkreis OSL. Wobchadowe towaristwo Górne Błota-Łužyca mbH (VG OSL) wobnowijo doněntne sćažory pśi busowych zastanišćach (Haltestellenmasten) we wokrejsu Górne Błota-Łužyca. Pódla wudopołnjujucych pódaśow k zastanišćoju a busowym linijam dostanu wóni fryšny, změstymi dwójorěcny design. Toś jo se sajźił fokus na dolnoserbske kórjenje regiona. Slědny stwórtk jo se w Kalawje pśi zastanišću pśed financnym amtom prědny nowy zastanišćowy sćažor z chórgoju wótekšył. How su informacije teke w dolnoserbskej rěcy, a tak dej to byś tek w drugich městach serbskego sedleńskego ruma we wokrejsu OSL. K temje dwójorěcnosći jo se zapśěgnuła, se wě, wokrejsna zagronita za serbske nastupnosći Hanka Rjelcyna. Rozsud k nowowugótowanju zastanišćowych chórgojow źo slědk na póstajenja krajneje wustawy a na Bramborsku Serbsku kazń. Až do kóńca lěta 2014 dej se nejpjerwjej 100 nowych sćažorow z chórgoju we wokrejsu OSL instalěrowaś za něźi 39.000 euro. Dwě tśeśinje budu z nimsko-serbskim pópisanim.