Z Pódstupima/Potsdam. Wałtoru, 9. julija, jo se wótměło 38. zjawne wobradowanje Rady za serbske nastupnosći w Bramborskej. Głowne dypki na dnjownem pórěźe su pótrjefili aktualne pšašanja a problemy nastupajucy pśigóty bliskich nowych wuzwólowanjow Serbskeje rady dnja 15. decembra 2024 a k nowo wupisanym stipendiumom za studěrujuce na ceptaŕstwo za pśedmjat serbšćina w měsće Chóśebuz.

Prědny dypk slědnu wałtoru jo był rozpšawa zagronitego krajnego kněžaŕstwa za nastupnosći Serbow a statnego kulturnego sekretarja Tobias Dünow. Chwalił jo wón ceremoniju mytowanja Madleny Norbergoweje z Mytom Miny Witkojc 2024 a jo pśipowěźeł, až městno jogo referenta drje buźo wót 1. septembra togo lěta nowo wobsajźone.