W slědnem wudaśu Casnika som pisał w pśinosku „Dr. Torsten Schüler a dr. Wolfgang Bialas stej pśedsedarja parlamenta SPN a města Chóśebuz“, až běchu mimo Lěwice kandidaty wšych partajow a wólbnych kupkow w Měsće zlubili, až za nich ta „Brandmauer“ njestoj. To njejsom se wumyslił. Ně, na wólbnem forumje 30. junija w City-zalu na Dwórnišćowej droze w Chóśebuzu, na kótaremž som se wobźělił, jo jaden wobydlaŕ wšych kandidatow direktnje pšašał, lěc płaśi za nich ta „Brandmauer“ (napśeśiwo Afd), gaž budu wuzwólone do měsćańskego parlamenta. Wšykne, mimo Lewice, su k tomu jasnje wótegronili: Ně.

Něnt pak njewěm, lěc jo tam pódla był zastupnik wólbneje kupki SUB (Sozialer Umbruch Cottbus). Torsten Mak, kenž jo kandiděrował za toś tu kupku, ako jo něnto zastupjony z jadnym wótpós-łańcom w nowej měsćańskej zgromaźinje, jo se pominał jadno pó-pšawjenje (Berichtigung) w Casniku. „Žednje njejsom take zlubjenje wótedał. Nawopak, njejo to za mnjo žedno pšašanje, až mjazy mnu a padom pšawoekstremiskego za – wobmyslenja stoj kšuta murja. To same licy teke za druge kandidatki a kandidaty našeje lisćiny...“