Z Gubina/Guben. Wót wałtory, 9. julija, pokazujo se w pólskem Gubinje w tamnem měsćańskem muzeju fotoowa ekspozicija „Woglěd pla susedow. Dolnoserbske nałogi w běgu lěta“. Wustajeńcu pśigótowało a spěchowało jo Towaristwo lubowarjow regiona Gubina. Awtorka wobrazow a pśidanych tekstow jo dr. Justyna Michniuk z Chóśebuza. Ekspoziciju jo wótwóriła Urszula Kondraciuk w nadawku schórjonego pśedsedarja domowniskego towaristwa Stefana Pilaczyńskiego, kótaryž se južo dłujko zajmujo za stawizny Serbow. Mjazy pólskimi wobydlarjami ga jo bóžko powšyknje mało znate wó Łužyskich Serbach w bliskem susedstwje, kótarež maju how swóju domownju ako indigeny lud. Až Serby swóju słowjańsku rěc a pśeliš zajmne nałogi pśez stolěśa su zachowali njeglědajucy na politiku germanizacije w zajźonosći, młoge wobźiwuju.