Sobotu, 6. julija, jo se skóńcyła 5. Europeada, europske mejstaŕstwo narodnych mjeńšynow w balokopanju w Flensburgu. Njewócakane stej pla muskich Friûl z Italskeje pśeśiwo Okcitanarjam z Francojskeje 2:0 dobyli, a friziskim žeńskim jo se z drugim městnom sensacija raźiła: Druge městno su wóni dobyli, ale pśeśiwo pódpołdnjotirolskim žeńskim njejsu měli pla 1:11 bóžko žednu šansu.

Našej mustwje bóžko njejstej dojśpiłej slědnu rundu turněra „mjazy mórjoma“, weto su naše grajaŕki a grajarje, ale wósebnje jadnab 350 do 400 serbskich pśiwisnikow z mócnym juskanim a głosnym spiwanim trajucy dobry zaśišć w grajnych městnach w Šleswig-Holštejnskej a pódpołdnjowej Dańskej zawóstajili. Gósćinarje na dańskem športnišću IF Stjernen w Flensburgu su se wó atmosferje pśi graśach žeńskecego mustwa tak wjelgin wjaselili, až su Serbow ned pětk wjacor, 5. julija, na public viewing běrtylfinale Nimska pśeśiwo Špańskej pśepšosyli.