Z Města/Cottbus. Serbska drastwa – to jo wjelika tema. A hyšći wětša buźo, gaž se teke na to źiwa, kak designerki a designery se źinsajšny źeń wót serbskich drastwow inspirěrowaś daju. To wšykno na póměrnje mało městnje ako wósebnu wustajeńcu kompriměrowaś, kótaraž impulse dajo a zajm na wěcej wubuźiju, to jo Serbski muzej se lětosa prědk wzeł a to wuspěšnje do statka stajił. Dnja 14. junija jo se wótwóriła wustajeńca „Drastwa a moda/Tracht und Trend“ a buźo hyšći až do 3. nowembra wiźeś.