Z Janšojc/Jänschwalde. Krotko pśed prozninami organizěrujo wjele šulow hyšći wulěty, na pśikład do muzeja abo do zwěrjeńca. Tak jo woglědał stwórty lětnik Wobswětoweje šule Dešank (to jo zakładna šula, źož bóžko njamaju serbsku wucbu) Serbsko-nimski domowniski muzej w Janšojcach. Dnja 11. julija, jo se tych 45 źiśi źěliło do styrich kupkow, aby se wopóznali z muzejom.
Wjednica muzeja Rosemarie Tšukowa jo se wótměnjaty źiśecy program wumysliła. Źiśi su zgónili, kak se lan źěła a płat se zgótujo. Kuždy kšac wót sušoneje lanoweje rostliny až k źěłanju pśi staśiwach (Webstuhl) su póznali. Na dogromady styri stacijach su wšakorake nadawki na wukniki a wuknice cakali. Rosemarie Tšukowa jo mógała se pśi tom na pódpěru cesnoamtskich a domowny spušćiś – pomagali su pśedewšym pśi wobstaranju tych styrich stacijow. Tak jo rěcna motiwatorka wót Domowiny Iben Lotric jadnu staciju na starosći měła, źož jo źiśam pokazała kólasko a kak se z nim nitka pśěźo.