Z Noweje Jsy pśi jazoru/Neuendorf am See. Zachadny pětk jo kolektiw Wakuum gromaźe z towaristwom Old Shadow e.V. ze Starego Škódowa na projektowem campingowem městnje „Neu am See“ w Nowej Jsy pśi jazoru pśepšosył na koncert. Wóni su se zmakali, aby se mjazy sobu wuměnili a se w seśi zwězali a zajmne koncerty abo druge zarědowanja organizěrowali. Towaristwo „Neu im See“ na pśikład se stara wó to, na swójom campingowem městnje koncerty abo teke źiwadłowe kuse – teke za źiśi – organizěrowaś. „Old Shadow“ e.V. jo kreatiwna komuna. Na drugem boce Nowsańskego jazora su grunty wobstarali a bydlenje wutwarili, ga samo muzikowe studijo wugótowali. A kolektiw Wakuum jo kulturelna, kreatiwna, subkulturelna, feministiska a queerna seś młodych Dolno- a Górnoserbowkow a Serbow, kenž na wšakich pólach wuměłstwa a kultury statkuju. Pótakem idealne wuměnjenja za pśichodne inspirěrujuce nimsko-serbske projekty – wót Łužyce pśez Bramborsku až do Barlinja.