Budyšyn/Bautzen. Źiśi maju něnto pó napinajucem šulskem lěśe prozniny. A tak teke studentki lipšćańskeje uniwersity, ako se dalej kubłaju ako wótnabocniki (Quereinsteiger) na ceptaŕki serbšćiny. Wóni njejsu gótowe ze studiumom, deje wšak hyšći pisaś bachelorowe abo masterske źěła, ale něnto su za nich teke akle raz někotare tyźenje lichego casa a wótpócywanja. Gromaźe z docentoma dr. Madlena Norberg a Till Wojto a z dalšnym studentom z Lipska su se pak wudali 13. julija na swóju slědnu ekskursiju do Górneje Łužyce, do Budyšyna. Dokulaž mógu ekskursije casa dla pśecej jano sobotu byś, njejsmy mógali žednej instituciji w Serbskem domje abo w Serbskem instituśe woglědaś, což studenty su bejnje woblutowali, ale smy se wěźeli radu.