Z Groźišća/Grötsch. W tej wjasce blisko Mósta maju wjele starych a rědnych burskich dwórow a žywnosćow. Jadna z nich jo ta wót Halkojc, kótarymž su něga gronili „Šenkaric“. Tam stej teke gósćeńc a pensija za pśenocowanje. Halkowe źarže wjele wót togo serbskego, pśi brožni wisy wjelika tofla, źož jo napisane „Witamy was wutšobnje w Groźišću“. Domowinska župa Dolna Łužyca jo tam na tom wjelgin rědnem a wjelikem dwórje južo pśewjadła swóju głownu zgromaźinu a how jo na swěźeńskem zarědowanju pócesćiła cłonkow, ako pśisłušaju južo wušej 50 lět Domowinje. A pśecej su wšykne pśibytne chwalili, kak rědnje tam wu Halkojc w Groźišću jo! A to lěcrownož rowno we srjejźi župy njelažy, ale tšochu na boce.