Z Lubina/Lübben. Dłujko njejsu wěźeli, lěc mógu lětosa w Běłej Górje łapanje kokota wugótowaś. Pśicyna za to jo była, až jo weterinarny amt we wokrejsu Dubja-Błota kritizěrował wužywanje pšawego kokota pśi woplěwanju žnjownego nałoga. Nowy Casnik jo we wokrejsu za wuslědkami diskusije pšašał. Jasne jo mjaztym, až běłogórjańska młoźina a tradiciske towaristwo smějotej swój žnjowny swěźeń sobotu, 10. awgusta, ako zwucone z pšawym kokotom pśewjasć.

Casnikaŕski běrow wokrejsa Dubja-Błota pokažo we tom paźe na wustawu kraja Bramborskeje, kótaraž zawěsćijo pšawo na zachowanje a spěchowanje serbskeje rěcy a kultury we zjawnem žywjenju. We bramborskej Serbskej kazni (SWG) pšawo se konkretizěrujo: Pó § 7 wótstawk 2 sada 2 SWG spěchuju gmejny a gmejnske zjadnośeństwa w Bramborskej teke serbske nałogi.