Ze Slěpego/Schleife. W Slěpem njestoje jano stare burske domy, ale we tej wjelikej a znatej serbskej jsy w Mužakojskej góli nadejźoš tam rowno tak wšake historiski wažne a zajmne twarjenja. To jo na pśikład tamna rědna cerkwja, ako bu 1346 prědny raz w starem pismje naspomnjeta, a teke fara (faraŕnja) jo taki wósebnje gódny dom. Blisko dwórnišća pak stoj hyšći jaden dom, kenž ma swóju wósebnu a zajmnu historiju. Jo to tak pomjenjona „Lejnikojc wila“ pśi droze do Nowego Města (Neustadt).

Chto jo był Paul Lehnigk (Pawoł Lejnik), ako jo žywy był wót 1899 do 1948? Naroźił jo se w Slěpem, pó šulskem casu jo wuknuł we głažkaŕni w Běłej Wóźe na industrijowego pśekupca. Pózdźej jo kupił we swójej domacnej jsy jadnu fabriku, a za tym jadnu dalšnu we Wujězdu nad Sprjewju (Uhyst (Spree). Dogromady jadnab 120 luźi jo we wobyma gótnicoma źěłało, a za wětšy źěl su to byli serbske žeńske a muske. Wón jo był teke we Weimarskem casu žedne lěta cłonk Sakskego parlamenta a jo se tam zasajźił za pšawa Serbow.