Lena Weißhoffojc studěrujo na Barlinskej Humboldt-uniwersiśe slawistiku a jo w ramiku swójogo masterskego studiuma zachopiła z pomocu online-kursow dolnoserbsku rěc nawuknuś. Lětosa jo se wóna wobźěliła na kompaktnem kursu rěcneje šule a rozpšawijo wó tom Nowemu Casnikoju ze swójogo wósobinskego wida.

Za tym, až som lěśojski kurs w slědnem lěśe zapasła, som se kśěła – cele pó nimskej wašni – docasnje pśizjawiś, to groni w septembrje. Pśebytk som teke malsnje namakała, jano mójo prědkwjasele jo było pśez pśepytowański stres w uniwersiśe tšošku pókšajźne.

Pśijězd som planowała njeźelu, dokulaž kurs by dejał se pónjeźele, zeger źewjeśich, zachopiś. Spušćobnosći zeleznicy njejsom měła lušt dowěriś. Wótpołdnja som do mójogo małego bydlenja blisko Dolnoserbskego gymnaziuma pśeśěgnuła.