Z Města/Cottbus. Južo wót lěta 1995 (2025 buźo 30-lětny jubilej) pśewjeźo Šula za dolnoserbsku rěc a kulturu w kuždem lěśu tyźeński kompaktny kurs za dolnoserbšćinu, pśi kótaremž mógu se wobźělniki ze wšakimi pśedznaśami wobźěliś. Toś taki kurs póbitujo mimo rěcneje wucby teke wjele zarědowanjow kołowokoło serbskeje kultury a krajiny Łužyce. W ramiku pśednoskow, wulětow, wjeźenjow abo rozgronow, na pśikład na serbskem bliźe (glěj dołojce) w Serbskem muzeju, mógu kursisty se dłymoko do serbskeje kultury, stawiznow a rěcy zanuriś a je na městnje dožywiś.

Lětosa jo se wótměł kompaktny kurs w tyźenju wót 22. do 26. julija. A wuwiśe zachadnych pór lět jo se pókšacowało: Zasej su sobuźěłaśeŕki rěcneje šule nowy rekord pśizjawjenjow a wobźělnikow registrěrowali. Skóńcnje jo lětosa 81 luźi kurs dolnoserbšćiny w tśich kupkach za zachopjeńkarjow, w dwěma za pókšacowanych a w dwěma konwersaciskima kursoma z pomocu 11 docentow – což jo teke rekord za kompaktny kurs – absolwěrowało.