Z Města/Cottbus. Ned tśi źěłaŕnicki jo kuratorka a muzejowa pedagogowka Katharina Kliemowa za stwórtk, 1. awgusta, planowała: dwa raza za źiśi a familije (zeger 10:00 a 14:00) a wótpołdnja zeger 15:30 za dorosćonych. Tema jo była zwězana z aktualneju wustajeńcu „Drastwa a moda“: módrośišć. Jo ale jasne, až njeby se raźiło w połteragóźinskej źěłaŕnicce kuždy kšac starego rucnikaŕstwa pśewjasć. Dla togo jo wjednica kursa, Astrid Šramina, ze Serbskeje kulturneje akademije, nejžpjerwjej teoretiski pśeglěd wó źěłowem wótběgu módrośišća dała. Praktiski su wóna a wobźělniki źěłaŕnickow z běłeju tekstilneju barwu z pšawymi drjewjanymi modelami abo z kołkami, ako teke z pomocu acrylowych šablonow na módrych a carnych serwietach, měškach, šorcach abo taškach wšakorake mustry a motiwy śišćali. Tej technice se groni direktny śišć a jeje wužytk jo, až wóna njejo taka komplikowana a droga ako pšawy módrośišć. Na kóńcu pak wuglědaju pó tej wašni wupyšnjone tekstilije skóro rowno tak, ako módrośišćowe šorce abo druge drastwine źěle.