Z Hochoza/Drachhausen. Wóstudnje buźo pla hochoskeje młoźiny skerjej rědko a prudlenje musy teke cuze słowo byś za młodostnych. W slědnem lěśe jo se młoźinska šefowka Iben Lotric něco wósebnego wumysliła. Wóna jo kśěła južo pśecej ze swójeju młoźinu k Balstiskemu mórju jěś. Na slědny młoźinski jězd su se pśed koronu wudali a jo južo dłujko slědk lažał. W casu korony wudaś se na młoźinski jězd, njejo móžno było. Pó koronje jo musała młoźina se akle zasej gromadu pśiś. To njejo rědkosć, teke druge jsy a młoźiny su se musali akle nowo sortěrowaś. Dogromady 26 młodostnych jo wót 18. až do 21. julija na pólske Baltiske mórjo jěło do města Sarbinowo. „Smy se wědobnje za prědne dny prozninow rozsuśili, aby teke wukniki mógli sobu pśiś“, tak Iben Lotric. Cas pśi Baltiskem mórju su wužywali za mały pśetergnjeński cas za pśiduce tšojenja w Hochozy. Cas we wukraju su pśežywili z towarišnymi graśami za młodostnych, pśechójźowanjami pśi mórju a su kupali. Wjedro jo se derje měniło z hochoskimi młodostnymi a tak jo se dał jaden abo drugi mócny wopaliś wót słyńca.